{ .. الريش !

يا بقايا ريش , من طير الغرام !

هفهفك ريح التجافي وارتحل ..

راحله بشويش , من دون السلام ..

يا طيور مهاجرة خلّي رحل ..

علّميني كيف أوصل له كلام ..

دوّري له حتى لو بأقصى زحل !

اتبعي جرّة تغاريده : كلام ..

يترك آثاره نغم في كل محل ..

كفّها الناعم مثل ريش النعام ..

ريقها منبع من اطراف النحل !

عنقها بينه وبين الصدر عام ..

خدّها مثل الشفق في كلّ حِل !

واسئليها يا طيورٍ في الغمام ..

ليه خلَّى الريش ذكرى ثم رحل ؟!

يا مسافره بكره لبيروت !

تجهزّي يا مسافره بكره لبيروت ..

لمّي الشناط اللي وسطها الدراهم !

حنّا شعب ما لقي له فقيرنا قوت ,

غنيّنا ان فطّره : ياكل غداهم !

ما يشبعه شيّ واذا صاحوا بصوت ,

كمل على السفره وخلّص عشاهم !

حنّا ضعوف نهايط بلبْس البشوت ,

فأعراسنا والجيب فاضي وواهم !

نعدّ الدراهم نصّها قروض فـ بيوت ,

وفي كلّ سهم لى نزل نبغى نساهم !

شبابنا همّ الوطن لو ماتوا يموت ,

من بعدها حب الوطن ميّت وراهم !

والاجنبي لى برد فـ بلادنا كوت ,

يسحب من الشعب السعودي دفاهم !

فينا شهامة وشعبنا اليوم مكبوت ,

حبّ الوطن يطول ونبقى معاهم,

بس الفلوس اللي بتسري لبيروت ,

الدار أولى في شنيط الدراهم !

جرّي وراك الغيم !

جرّي وراك الغيم ..

هلّي والمطر !

غرّقي بي كل شارع ,

اسحبيني للممر !

ودّي أشاورك وأهمس :

يا بشاير غيم !

الصبح ذا اليوم مشمس ,

من فقدتك في السهر ..

باقي متواجد غيابك !

ما رحم مجروح بابك ..

اللي زاره : وانكسر ..

غيّبي ذا الشمس : طِلّي ..

يا سحابة وين ظلّي ؟

فاقدك بين البشر !

رؤى ..!

كل ما شفتك : شبه ذيك السحابه !

والقمر ما بينها ( مبسم ) رؤى !

كل ضيق فـ داخلي أعلن غيابه ..

شد ترحاله عن الخافق نوى ..

يا بريئة , يا ترانيم الصَبَابَة ..

يا غصن ورد من الزين ارتوى ..

انتي طفلة , ما لك فـ جيلك مِشَابه ..

بك محيّا : كل حُسْنٍ له غوى ..

يا نغم صبح يغني في انطرابه ..

كل صبح من تعابيرك ضوى ..

طفلةٍ ما يشبهك إلا السحابه !

كل ما هلّت مطر / ضحكت رؤى !

{ .. صباح الخير ~

صباح الخير ..

والنسيم العذب ,

وروعة التبرير !

,,

قلت : 

ليه الجرح ؟

,,

قالت :

إن الحب /مشكلته يغِير !

إحتجت لك في يوم ؟

طير انكسر به جنح !

وإحتاج لك : ويطير !

تخيّلات !

تخيلوا إن المشاعر : أوادم !

واذا بغيت انسان صادق شعوره !

إنتي [ وطـــــــن ] !

لو قلت لك : إنتي [ وطن ] ..

يعني : أغليك !

والدليل إنك:

جَرحتي ..

ظَلمتي ..

كَسرتي ..

تمردّتي ,

وأنا ؟!

هذا أنا :

[ عايشٍ فيك ] !!

إيه أحبك ..!

إيه أحبك : لكن إحساسي يكابر ..

لا تسئليني ليه ما قلت لك : أحبك ..

خوفوني من المحبّه , وآنا خابر ..

إن المحبّه : شي لو حبيته حبّك !!

كلّ ما قالت أحبك : ابقى صابر ..

وأبتعد عنك ولا ادري ويش طبّك !

في كل شيّ أمرّ به لك شي عابر !

حتى فـ منامي شايفك , ما تخافي ربّك ؟!

وينـــــك ؟!

وينك ؟

اسأل الشارع عن آخر خطوتينك ؟!

الشجر ,

والغصون اللي مدامعها : مطر !

والرصيف ..

وبرد الشتا ..

ونور بعد هجرك : غفا ..

جاوَبُوني , ثم رحلت :

كلّهم فاقدينك !

{ .. عتب !

ما غفيت .. الا على أنوار الصبح !

ليه ؟

مدري !

ما اعرف ليه السبب ..

المهم ..

ان السهر كان الرفيق ..

وكان يسامرنا التعب ..

حتّى أنوار الطريق ..

نامت بعد ليلٍ : صعب !

وانتي بأحضان الوساده ..

ما دريتي وش جرا لي من نكاده !

كل ما جيتك أبقسى ..

قال لي قلبي : عتب ..

يا صاحبي خلّه عتب ..

{ .. يــبْــس : وتكسّر ..!

هذا الورق ..

يبس : وتكسر !

قم تعال ..

وانفض غبار الوعد : وتعذّر ..

ما دامني كنت ضمنك ..

كنت منّي وانا منّك !

لا تجرح الجرح الأخير ..

الألم فيه التأم ..

خلّك مثل أول ..

يوم انت لجروحي ضماد ..

اذكر اني أودعك .. ومن لهفتك ..

أغادر لقانا وأقفّي ..

ويصيح قلبي : عاد , عاد ..

ونرجع نكمل سوالفنا ..

نمدد في دقايقنا ..

يطول الوقت وما ندري ..

قبل ساعة ؟ قبل ثنتين ؟

متى قلنا فمان الله ؟

وتشرق شمسنا ونبقى ..

ويغادرنا السهر ,

والليل ,

والنجمة ..

ونتفرج انا وياك : قمر في ليلنا يغفا !

ونرجع في سوالفنا ..

نناظر ساعة الموعد !

يا الله !!

تأخرنا ..

ويرحل عننا الموعد ..

ونبقى في أماكنا ..

يوقّف طير ,

على ذاك الغصن ويطير ..

ولا حتّى يناظرنا !

يخبّيه الشجر بينه ..

فضولك يسألك .. وينه ؟

يجاوبك الورق : طار ..

تعالي اقطفي ثمره ..

عشان يلامس كفوفك ..

ويزفر هالشجر زفره ..

غصنه لامس كتوفك ..

وانا واقف انادي لك ..

خلّي الغصن :

لا يجرّحك شوكه ..

حتى من أغصان الشجر : أغار !

تذكرتي زمان أول ؟

تعالي الحين شوفيني ..

انا ويّا الشجر واقف ..

نصارح بعضنا بحبّك ..

ذبل جفني وتحسّر ..

والشجر ؟!!

شوفي الورق ..!

يبس : وتكسّر !

[ قاسي ]

قاسي : الصبح وإحساسي !

بدون شعور يقتلني ..

يعزّي باقي أنفاسي !

أنا صاحب أمل : متصاحبين ..

يفرقنا بعض هالناس ..

يعيّشنا الألم في يأس !

نصير أغراب ..

ما كنّا أبد أغراب !

تدُور الدنيّا : تتعبنا ..

تدوّرنا ..

تدوّرنا ..

ترجعنا في لحظة [ أمس ] !

وتغرب شمس ..

نمسّي الليل والظلمة ..

ندوّر في السهر كلمه ..

أنا ساهر مع غيابك ..

كَثر صمته !

أحاول أزعج أهدابك ..

أضوّي الذكرى في عينك ..

أنا ونجمه .. يسامرنا القمر بإسمه !

في ظلمة ليل ,

أحس الليل ما يدري ..

أشوفه غافي بحلمه !

سكوت الليل يزعجني ..

أبي ليلي معك صاخب ..

أنا آسف : أنا أحتاج لي صاحب ..

كثير أشياء أفقدها مع ليلي ..

يهيضني السهر وأشتاق !

مُشتت !

ولا أدري ؟

من اللي ساكن بصدري ؟!

كثير أشياء : أجرحها ,

وبدعي ربّي : سامحها !

الا يالله : سامحها ..

{ .. ناده !

أطالعك : في تالي الليل , مشتاق ..

غمّض عيونك واستند عالوساده ..

بكره اللقاء من أوله : يبتدي عناق ..

يا موعدي وصّ الدقايق : ركاده ..

فينا وله , فينا احتياجات , وأشواق ..

البارحه كنّه سنه .. يا بعآده !!

بكره متى ؟ معاد ذا اليوم ينطاق !

برسل لـ ( بُكره ) وقت .. وآقول : ناده !

{ .. يا مطر ..!

يا مطر : غرّق شوارع ديرتي ..

وانزل ..

شفت الجفاف اللي حصل !

والله إنه ما رحم بي ضيقتي ؟

هزهز كتوف غيومك اللي ما بكت !

حرّك مشاعر ذا السماء ..

في الأرض من تحتك وطن ..

يمد يده مستحي ..

متردد وكله ضما !

في جيوبه [ يبّس ] الخبز وتكسر ..

انزل , وليّن قسوته ..

في جبينه : كفكف الجلد وتعسّر ..

انزل , وسيّر حاجته ..

في عيونه : دمعتين , وجفن عيا لا يبيّنها : يكابر ..

كلّ ما جات بتسافر .. غمّض عيونه : تحترق !

الله يعينه ..

يا مطر , من زماااااان أدوّرك ما لقيتك !

ليه غايب ؟

قالوا الأحباب وينك ؟

قلت : المطر ؟ شايب ..

ما صدقوا ..

قلت : شوفوا الشيب لون السحايب ..

ماعاد تقدر للمطر ..

بس الصواعق !!

يا زينهم ! و صدقّوا ..

عاشوا وسط خدعة زمان ..

وانبسط من خدعته شخص [ خايب ] ..

[ وداعًا للقاء ]

لم نتفق على موعد اللقاء ..

فأتى الشتاء يشتتنا ..

بقينا أشقياء ..

طموحين ليس إلا : بل رفقاء !

لا نحب ,

أو نحب : ولكنّ الخوف نقاء !

تُحاورنا الأشياء في صمتٍ ..

نبادلها الحديث في صمتٍ ..

على طاولة الوحدة : لسنا سعداء !

اقتربي من دفء تلك النار ..

قلبي يحترق فيها ,

دعي الأحلام تجثو : على ركبتيها !

أقبلي إلى الأحزان ساكنةً وفاجِئيها !

كوني الدواء : ملأتِ حُبَّك داء ..

فما كل هذا الجفاء ؟!

إني أفتقد اليوم حديثًا , طاغيًا ..

يتردد بين السمع ,

حين أردد أغنيةً :

عيني سُحُبًا تمطر دمع !

يا شيئًا من أيامي , يا حلمًا ضمن الماضي ..

إني أقترب إليك بقلب , لا يبصر إلا أنتي !

إني أحتاج إليك لِحُب , لا يصنعه إلا أنتي !

كَوْنًا أنتي , فكُونِي أنتي ..

ترتبني الأيام في قربك ,

فتبعثرني منك : يدانٌ تلوّح , تذاكرٌ وحقائب , سفر !

يشتد البرد ,

فأحترق شوقًا : شوقي برد !

مطرٌ وشتاء , حزنٌ مبتسمٌ ..

أيام , ماضي , ذكرياتٌ ولقيا !

جرحٌ ملتئمٌ !

عاصفة يوقظها : السفر !

وداعًا للقاء !

{ .. حلمت ..!

ليه الحكي في داخلك ترجمه الصمت ؟!

ليه أنتظر منك إجابه وأخافك ؟!

متألمٍ ؟ قلّي : تراني تألمت ..

شينه اتجاهلني , وتشكي جفافك !

أصعب شعور البارحه : إني ما نمت !

بقول لك : شيٍّ حصل لي وطافك ..

البارحه , قد كنت افكر بك / وهمت ..

أتخيلك متلحفٍ في لحافك ..

يومه طرق بابك , ولبّيته وقمت !

قالوا تراه اليوم .. لحظه زفافك ..

جيتك أبارك / والله ان خاطري زمت ..

مترددٍ في جيتي , وأبغى مشافك !

فجأه تقاطعني تِكَسّر بها الصمت ..

صرت استمع واقول : وشو خلافك ؟!!

قالت : سعودي ؟ مشكلتك انك حلمت !

انا حقوقك .. واجباتك .. منافك ..

انا الوظيفة ؟ ليتني ما تكلمت ..

في كل شهر وانا أشكي جفافك !

ابوي ربّاني على الاجنبي ودمت ..

وانت السعودي ؟ تحسب اني اعافك ..

{ .. عندي وطن ..!

انا ولدكم يا وطن ..

بأول سنة .. ألقى لمرقادي حضن ..

مرت سنين وروّحت , وانا طفلكم يا وطن ..

لين أقبلت سادس سنه , بديت أشعر يا وطن ..

لى مر بي منّك سؤال , وش حلمك اللي بيندفن ..

جاوبت وفي عيني أمل , وبعيون مسؤولك كفن ..

حلمي إني فيك أعيش , أبـ أخدم تراب الوطن ..

كنت الطفل اللي شعوره : واحد آماله كثير ..

وين الحلم , وين تحقيق الجواب , وين إحترامي والسكن ..

آسف .. على حلمي اللي كان ..

كنت أحسبه .. مجرّد سؤال ..

لى جيت أنا أتذكر جوابي ..

كانت إجاباتي حزن ..

هذي المصيبة يا وطن .. إني انا إبن الوطن ..

ليه ما كانت من أول ؟

ليه تسأل ؟! .. ليه بس ما كنت تسأل ؟

اعتبرني كنت ساكت .. إعتبرها بس سوالف ..

إعتبر كل إجاباتي .. ما كانت ..

لأني أخّرْت الجواب ..

الحين خذ مني إجابه .. بأعتبر إنك سألت ..

حلمي إنك بي تحسّ .. لأجل أسعد تراب الوطن ..

حلمي إنك لو تعاني .. أشيل عن كتفك حزن ..

حلمي إنك تعترف لي .. إن بأبناءك وهن ..

أنا الوطن .. حتى لو ما اسمي وطن ..

أكبر دليل إني عايش .. ولي حق في ترابك دُفِن ..

هذي الإجابة يا وطن ..

تقدر تحقق لي حلمي .. لأن بأحلامي شجن ..

يمكن أفيد .. أكثر من أغرابٍ تبيد ..!

يمكن أنفع , مدري .!

حبي لك بيشفع ؟!

لكن عمومًا يا وطن ..

مهما تألمنا .. وكانت أحلامي حزن ..

الحياة فيكم جميلة .. على الأقل عندي وطن ..

{ ..من ذكريات اليوم الوطني ..

من ذكريات اليوم الوطني :

.

في كل عامٍ موطني وإنت بخير ..

وفي كل عام تعيش خير وسعاده ..

بس بسأل يا وطن : حولك تباشير ؟!

ملّيت أسولف في الصبح مع الوساده !!

ماهو عدل لي كم سنه دون تغيير ..

ما توجعك يا موطني هذي الشهادة ؟!!

يأست على رفّي ولا طار ذا الطير ..

ودّيتها يا موطني كم من عياده ..

يا شينها لى فاتني منّك الخير ..

والأجنبي ماكل حقوقي بزياده ..

كيف احتفل يا موطني ؟ ابغى تبرير ؟!

ابنك يفيدك يا وطن ! .. ردّ الإفاده ..

 .