اسعفيني من عنا همّي ليَا جاني غرام
اذبحيني في وهم حبك ولا به حسوفه
انقذيني من حوَر عينك على شطِّ الهيام
مغرمٍ عانا حياته في نواظر هنوفه
زلزليني فوق رمشك وآتدحرج بانهزام
واتركيني تحتِ جفنك ساهي ٍ في خسوفه
ادمعي عينك تواضع واسمحيلي بالكلام
حبنا لهجة غرامه باينه في حروفه
انطقي حلو السوالف من حلى شفاه ٍ لمام
غازليني لين ِ قلبي ترتعش به رفوفه
اتركيني مثل ِ طفل ٍ ضايع بوسط الزحام
تايه ٍ قاعد يدور وجهته في وقوفه
ما احتمل صعق البوارق واستكن بين الحطام
يذرف دموعه تواسي بالبكى حال ِ خوفه
يرتجي صعب الأماني بين ِ لقيا وانهزام
انتحى صوب الهزيمه والهزايم تحوفه
ودعيني بالمدامع لين ِ ما يبقى سلام
واتركيني شخص ِ هايم في بقايا طيوفه
عانق ِ الماضي وخلى حاضره يرْمِي سهام
صار ِ من كثرة نزيفه غارق ٍ لى كتوفه
استحل تعذيب قلبه والجمر مثل الحزام
لى انتحى عن قامته صافح القبر بكفوفه
اسمحيلي بكلمتين واعذريني يالمرام
كل عاشق مننا ,, { له هواه وله ظروفه }
