يا بنت عمّي كلّ ما غيّم الشوف ..
تمطر عيوني حزن حاكاه صدري
البارحة كان الحزن يسكن الجوف
يفضح سكوته دمع عالخدّ يجري
هذي الدقايق كنها عقرب يطوف
كل ما نسيتك لدغة الوقت تطري
أختٍ وقدرك بين الاخوات مصفوف
ما لي ملامه لو تباكاك شعري
صبح الربوع اللي غدا ينبت صلوف
شمسه حزينه ما تبي شروق بدري
يوم اشرقت كن الشعاع امتلى خوف
يرجف وكنّه ما يبي النبت يدري
أخطا الطبيب ولا نفع صفق الكفوف
لكن قدر مكتوب .. وان ضاق صدري
ماتت شهيدة .. بس تباكيت الظروف
لكن لربي الحمد ويزيد شكري
ما ينفع الميّت سوى دعوه من جوف
وانا دعيت الله فـ سجود " وتري "
يا ربّي أجر اللي على بيتك يطوف
ميزانها يلقاه ويقول أجري
