{ .. أحبك وانت ما تدري ..!!

أحبك كثر ما تجهل وانت عايش بقربي

أحبك وآه لو تدري اخاف الزفره تجهلها

أحبك هذي انفاسي تلمح لك وش بقلبي

سمعت احساسي بالنسمه , يقول أهوا.. كملها

انا داري .. ولا انت داري .. وكل شعوري بجنبي

يحاولني على كلمة : انا ارجوك له قلها

أنا خايف .. تشتتنا يغربني يشرق بي

انا جرحي عقب أمسه .. يحذرني تجاهلها

كفايه كل ما جالك .. كفايه كل ما مر بي

كفايه لو أكررها .. سنين كثير تكفلها

أحبك .. خلها فيني , جروح الذكرى تلعب بي

تذكرني , تخوفني , تحذرني , تقول إلهى

انا مدري وش الطاري , انا ادري وش اللي بي

مشتت يا بعد عمري , خذ اشيائي وسائلها

خذ اغراضي / خذ الخاتم / خذ اقلامي وخذ كتبي

خذ اللي جالس بصدري ,, جروحه اصحاب ما ملها

سمعت اللي همس وسطي ؟! .. كثير اشياء يا حبي

انا اشيائي تسآؤلها , كثير أحيان يشغلها

يتوهني شعوري لك , أهو صدقي ؟ أهو كذبي ؟

أيا للحب لا اعلم , مشاقّ الفكر سهّلها

انا تايه مع قلبك , تتوهني وسط قلبي .؟!

احاسيسي تجاهاتك , تفضل قوم عللها

يكابر في الهوى ويرفض ؟ يعللني وهو طبي .!

خلاص اسمح لي لو تسمح , جلوسك وحده عللها

انا باكر , بعد بآكر , عاد الشوق يشتت بي

انا هالحين بآودع , هذي يمناي جاملها

تأسفها , تحسفها , تعسفها .. مشاكل بي

كثير احتار في وداعك , فـ بيحها وحللها

جنوني , كل افكاري , بسببها كنت معجب بي ؟

خلاص اليوم بتركها , ألملمها , أعقلها

سوالفنا , شقاوتنا , هذا الجزء من حبي

عطيتك , خله للذكرى .. وهذي زفره اقبلها

{ .. يا حسين ..!

يابو قحط بشكي لك الضيم وارتاح

البنت زايد في خفوقي هواها

البارحه مدري وش اللي بي انزاح

واليوم عادت كل ضلوعي كماها

الصوت ما منه صدى الصوت لو صاح

مدري متاني بعرف اللي خذاها

كم ضامي يبست شفاته ولا ناح

وكم راوي ما جف ريقه لـ ماها

العين من ترسم على الدرب مصباح

ما شفت عيني والغَشَى قد طواها؟!

ترمش وكنه بين الاجفان جَرّاح

وتخاف يوخزها ويسبب عماها..!!

 ما همني يا حسين كم من وجد راح

اصل الوجد ان راح وجد تلاها

كنها المسابح والخرز منها لو طاح

كل الخرز يتبعها ويجري وراها

 وش حيلتي والدمع منها ترا باح

اعجل علي يا حسين تكفى تراها

 الناس حست والفكر منها سرّاح

يا كثر سجّي في طريقي بلاها

 يا حسين تكفى وش دواء الحب لى اجتاح

منهو يحب بلا حبيب سواها

 البعد يمشي في طريقي ولا زاح

والضيق جنبه ما تنحَّى خطاها

 والدرب طال وباقي الدرب مسراح

والليل يحفر للحبايب ثراها

 ما شفت قلبي والسهم يدني ذباح؟!

يا قوّ قلب ما رقد من غلاها

ما تاه عني والقنص منه زوّاح

لكنها تدري دام قلبي عداها

 لبيه وش لي في الملابين ارباح

ما دام صوت ما سمعته معاها

ليت الغلا ان قال لبيه ارياح

تجر صوته للجنوب وسماها

وينطرب سمعي من الصوت لا لاح

ويبتسم قلبي يظنه لقاها

{ .. إلى من يهمه الأمر ..!

ياللي تزور الصفحة يوم بعد يوم

لا تحسب اني عقب فرقاك ضايق

لا تحسب اني بكتب بشعري هموم

وانه وداعك مسببٍ لي عوايق

قد قلت لك حبي الاول وهو الدوم

ما لي عقب غيد الغواني رفايق

وكان الصداقه عذر يوصل لك لزوم

عندي صديق نوره اليوم رايق

انت الذي حبيت وانت الذي تحوم

فلا تحسب اني عقب فرقاك ضايق