تقوم تلملم الساعه بقايا "تكتكات" تدور
تلملم حيرة البارح وبقايا الحزن وتشيله
تروح بصمتها صبح على اشجاره غدى عصفور
غصن ذاك الشجر يابس عليه الطير يشكي له
من اللي طيح ازهارك وطرف غصنك غدى مكسور
وش اللي طير اوراقك وجذعك عايش بجيله
يجاوب والورق يمسك بقايا غصنها المفتور
دقايق وقت بي مرت وجبرني الوقت عالميله
شف اوراقي صبح باكر تلاقيها بقايا سطور
وشف اقلامي بعد باكر تشل بحبرها شيله
وشف الدمعه على ارض غدى فيها الورق منثور
سبايب ريح بي هبت عليك الله وش هي له
قتلني الشوق يا غالي وفي قلبك اشوف قبور
دفنت احباب بك مروا وهذا القبر بآتي له
تجهز يالبكى يالله وجاملني ولو مجبور
حاول عالاقل تحزن وانا بحزن وبحكي له
بحر همي شكى يبكي وجفف من بكاه بحور
وذاك الضيق بي واقف على الشاطيء ومنديله
يناظر للشمس تغرب .. تغيب الشمس .. يغيب النور
وموج حاير جنبه يروح بعيد ويجي له
يبلل من طرف ثوبه زوايا ثوبه المقهور
وايادي الضيق في جيبه وغدر ذا البحر ناوي له
ليست هناك تعليقات:
إرسال تعليق